Shayari collection 11

Shayari message 1 

Ussey kehna ke laut aye,

Mohabbat awaz deti hai,

Tujhe phir se bulati hai,

Jo tu ne saath dekhe they,

Woh sapne sajaati hai,

Woh phoolon pe ruki shabnam

Tumhari raah takti hai,

Tumhe waapis bulaati hai,

Woh jugnu ab bhi kehte hain,

Teri ankhen jo unse sawaal karti theen,

Ussey jawab dene hain,

Saarey hisaab dene hain,

Kabhi to mujh ko kehne do,

Ke tum bin chaand bhi udaas rehta hai,

Meri ankhon ke woh aansu,

Jo girte hain to awaz dete hain,

Samandar ke kinaare sippiyan jo gungunaati hain,

Tumhe waapis bulaati hain,

Ussey kehna meri palkon pe thehra jo ik moti,

Tumhari raah takta hai,

Woh girne se darta hai,

Woh darta hai mohabbat ke bikharne se,

Woh darta hai palkon se girne se,

Woh ik muskaan jo thehri teri aahat ki chaahat main,

To saans lene se darti hai,

Ussey kehna ke laut aye,

Ke woh muskaan phirti hai,

Kabhi uss dar kabhi iss dar,

Ke tu jo aaye to tere honton pe sajj jaye,

Tere baalon main bikhar jaye,

Magar jo tu nahin aata,

To woh un raston ke saare kaanton ki nokk pe sone lagti hai,

Jahan se tum guzarte they,

Murr ke takte rehte they,

Meri saanson ko milte they,

Ussey kehna ke laut aaye,

Mohabbat awaz deti hai,

Tujhe phir se bulaati hai,

Ke laut aao..

Shayari message 2

Ab jo dekhen to koi aesi barri baat na thi,

Yeh shab-o-roz, maah-o-saal ka pur-paich safar,

Qadrey asaan bhi ho sakta tha,

Yeh jo har morr pe kuch uljhe huye raste hain,

In main tarteeb ka imkaan bhi ho sakta tha,

Hum zara dheyaan se chalte to woh ghar,

Jis ke baam-o-dar-o-deewar pe veerani hai,

Jiss ki har subah main shaamon ki pareshaani hai,

Uss main hum chain se abaad bhi ho sakte they,

Bakht se amman ki raahen bhi nikal sakti theen,

Waqt se sulaah ka paimaan bhi ho sakta tha,

Ab jo dekhen to bohat saaf nazar aatey hain,

Saarey manzar bhi, pass-e-manzar bhi,

Lekin iss dair khayaali ka silaah kya hoga,

Yeh to sab baad ki baaten hain meri jaan,

Inhe dekhte sochte rehne se bhala kya hoga,

Woh jo hona tha hua, ho bhi chuka,

Waqt ki lohh pe likhi hui har tehreer ke harff,

Khat-e-tanseekh se waaqif hi nahin,

Bakht maktab ke register ki tarah hota hai,

Apne number pe jo labaikk nahin keh paatey,

Unka kuch uzzr nahin, koi bhi fariyaad nahin,

Yeh woh taayer hain jinhe apni nawaah yaad nahin,

Linain kat’ti rahin, lafz badalne ke sabbab,

Koi tehreer musalssal nahin hone paayi,

Haasil-e-umar yehi channd adhoorey haakay,

Koi tasveer mukammal nahin hone paayi,

Ab jo dekhen to koi aesi barri baat na thi…

Shayari message 3

Zehen ke khayalon main,

Rooh ke ujaalon main,

Zindagi ki jheelon main,

Zaat ki faseelon main,

Rat.jagon ke daaman main,

Dil ke khushk sehraa main,

Chashm-e-tar ke ke daryaa main,

Dard ke jahaan main bhi,

Ashk-e-be.zubaan main bhi,

Aur kuch nahin rehta,

Teri yaad rehti hai..

Shayari message 4

Aaj bohat saalon baad maine eid manayi hai,

us ne khusbhuu ke jhoolon main

phoolon ki khawhishen bhejin,

us ne taaron ki thandi chaaon,

aur khawbon ki titliyaan bhejin,

aik vaada-e-fardaa bheja us ne,

saath nibhaane ka,

chorr na jaane ka,

Mujhe maloom hai woh behlaata hai,

mujh ko sataata hai,

magar us ke sapnon se,

uss ke waadon se,

maine aik duniya sajaayi hai,

Aaj bohat saalon baad maine eid manayi hai..

Shayari message 5

Iss eid pe tujh ko main kya bhejoon,

koi jugnuu,

koi taara,

koi sapnaa bhejoon ?

Koi phool bhejoon ad’khilaa se,

koi umeed,

koi aas,

koi nazaara bhejoon ?

Chaand bhejoon tujhe is eid pr dilbar,

ik khushbuu,

ik rang ka istaara bhejoon ?

Aye mere meherbaan,

roshni ki rang ki muskaan bhejoon ?

ya qauss-o-qazaa ki uthaan bhejoon ?

Apni aankh ka koi moti teri nazar karoon,

Ya hathon se maangi koi dua bhejoon ?

Phoolon se koi titlii ki mohabbat bhejoon,

kisi bhanwre ki lagan,

us ka tarrapna bhejoon ?

Kisi shamma ka jalta hua daaman bhejoon,

Ya baarish ki tarrapti hui boondain bhejoon ?

Mere hathon main ik aas, umeed aur dua hai,

iss eid pe main tujh ko bass itna keh doon,

Ke jis ko tum se mohabbat hai,

Woh sitaara mil jaye,

Aye mere mehboob tujhe iss eid pr,

Tujh ko iss eid pe

Koi tumhara mil jaye..

Shayari message 6

Kal hamesha ki tarah

uss ne kaha yeh phone pr

main bohat masroof hoon

mujh ko bohat se kaam hain

Is liye tum aao milne

main to aa nahin sakta

ab har riwaayet torr kar

iss baar maine keh diya

Tum jo ho masroof to

main bhi bohat masroof hoon

tum jo ho mashoor to

main bhi bohat maroof hoon

Tum agar ghamgeen ho

main bhi bohat ranjuur hoon

tum thakkan se chuur ho

main bhi thakkan se chuur hoon

Jaane mann

hai waqt mera bhi bohat hi qeemti

kuch purane doston ne milne ana hai mujhe

main bhi ab faragh nahin

mujh ko bhi laakhon kaam hain

Warna kehne ko to sab lamhe tumhare naam hain

meri ankhen bhi bohat bojhal hain

sona hai mujhe

rat.jagon ke baad neendon main khona hai mujhe

Main lahuu apni anaaon ka

bahaa sakta nahin

tum nahin aati

to milne main bhi aa sakta nahin

Us ko yeh keh kar Wasi

maine receiver rakh diya

aur phir apni anaaa ke paaon pe

sar rakh diya..

Shayari message 7

Amaa mujh ko roti do

Kal bhi tum ne baaton se

An-dekhi saughaaton se

Mera jee behlaaya tha

Mujhe khaali paitt sulaaya tha

Lekin ab na sehh paaon ga

Aaj na bhooka reh paaon ga

Acha mera laaal zara bahar khel ke aa jao

Main choolhe ki aatish pr

Kisi gumnaam vaseele ka

Koi hawaala rakhti hoon

Tere bhooke honntton pr

Ik tar nivaala rakhti hoon

Maan ne barassti ankhon se

Darwaze ke hilte bhatt main

Zeest ka chand dhundhlaaya dekha

Munne ka jaata saaya dekha

Phir uss ne apne kaanon main

Khud hi apni goonj suni

Ke jism ke thekkedaar ke paas

Mere iss zakham ka marham hai

Ik lamha tha shayed jeevan ka

Jab maaan ne apni betti ko

Baich diya aatte ke ivaz

Aur apne laaghar kandhon pr

Apni hurmat ki laash uthaaye

Ghar ko palatt parri ke jese

Koi sazaa-e-maut ka mujrim

Bojhal bojhal qadmon se

Phaansi-ghaat ko chalta hai

Amaa khushbuu kehti hai ke

Tum ne maamta ke taishe se

Faaqon ki singlakh chittanon main

Rizq ki nehar nikaali hai

Amaa mujh ko lagta hai

Aaj christmas, eid, diwali hai

Aapa, Aapa tum bhi khana kha lo

Dekho maan ke hathon ki mehak

Roti main shaamil hai

Iss pr tum ne do din se

Paani ka dhoka khaya hai

Khud ko bhook main tarrpaaya hai

Amaa aapa kidar hai ?

Kissi bassti main utri hai ?

Kaise tujhe samjhaaon beta

Kaise tujhe dikhaaon beta

Ab yeh daagh numaayan hai

Mere iss daaman maille pr

Teri aapa bikk gayi hai

Ik aatte ke thailay pr..

Shayari message 8

Jab tere sheher se guzarta hoon,

Dil bhi karta hai yaad chhup ke tujhe,

Naam leti hai zubaan tera,

Yeh bhi nahin mujhe maloom,

Kis mohalle main hai makaan tera,

Kaun si shaakh-e-gul pe raqsaan hai,

Rashq-e-firdaus aashiyan tera,

Jaane kin waadiyon main thehra hai,

Girat-e-husn kaarvaan tera,

Kis se poochon ga main khabar teri,

Kaun batlaaye ga nishaan tera,

Teri ruswaayiyon se darta hoon,

Jab tere sheher se guzarta hoon,

Haal-e-dil bhi na keh saka garche,

Tu rahi muddaton qareeb mere,

Kuch teri azmaton ka ddar bhi tha,

Kuch khayalaat they ajeeb mere,

Aakhir kaar woh gharri aayi,

Baar-e-dar ho gaye raqeeb mere,

Tu mujhe chorr ke chali bhi gayi,

Khair qismat meri naseeb mere,

Ab main kyun tujhse pyaar karta hoon,

Jab tere sheher se guzarta hoon,

Woh zamaana teri mohabbat ka,

Ek bhooli hui kahaani ka,

Tere kuuche main umar bhar na gaye,

Saari duniya ki khaak chhani hai,

Lazzat-e-qarb ho ke zakhm-e-firaaq,

Jo bhi hai teri meherbaani hai,

Kis tamanna se tujh ko chaaha tha,

Kis mohabbat se haar maani hai,

Apni kismat pe naaz karta hoon,

Jab tere sheher se guzarta hoon..

Shayari message 9

Ek shakss ko chaaha tha

Taaron ki tarah hum ne

Ek shakss ko chaaha tha

Apnon ki tarah hum ne

Ek shakss ko samjha tha

Phoolon ki tarah hum ne

Woh shakss qayamat tha

Kyaa uss ki karen baaten

Din uss ke liye paida

Aur uss ki hi theen raaten

Kab miltaa kisi se tha

Hum se theen mulaaqaaten

Rang uss ka shahaabi tha

Zulfon me theen mehkaaren

Aankhen theen ke jaadu tha

Palken theen ke talwaaren

Dushman bhi agar dekhe

Sau jaan se dil haarey

Kuch tum se hi woh milta tha

Baaton mei shabaahat thi

Haan tum saa hi lagta tha

Shokhi mei sharaarat mein

Lagta bhi tumhi sa tha

Dastoor-e-mohabbat mein

Woh shakss humen aik din

Apnon ki tarah bhoola

Taaron ki tarah dooba

Phoolon ki tarah toota

Phir haath na aaya woh

Hum ne to bohat dhoondha

Tum kis liye chonkay ho

Kab zikr tumhara hai

Kab tum se taqaaza hai

Kab tum se shikaayet hai

Ek taaza hikayet hai

Sun lo to inaayat hai

Ek shakss ko chaaha tha

Taaron ki tarah hum ne..

Shayari message 10

Ab ke uss ki ankhon main

Be-sabab udaasi thi

Ab ke uss ke chehre pr

Dukh tha, be-hawaasi thi

Ab ke yuun mila mujhse

Yuun ghazal suni jese

Main bhi na-shanaasa hoon

Woh bhi ajnabi jese

Zard haal-o-hadh us ke

Sogwaar daaman tha

Ab ke uss ke lehje mein

Kitna khurdraa-pan tha

Woh ke umar bhar jis ne

Sheher bhar ke logon mein

Mujh ko hum-sukhan jaana

Khud sa meherbaan samjha

Mujh ko dilrubaa likha

Ab ke saada kaghaz pr

Surkhh roshnaayi se

Uss ne talkhh lehje mein

Mere naam se pehle

Sirf bewafa likha

Sirf bewafaa likhaa..